Хоразм вилояти Урганч туманида фермердан пул ундирмоқчи бўлган бош мутахассис ушланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Урганч туман бўлими томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган. Унда Урганч тумани қишлоқ хўжалиги бўлими бош мутахассиси Ж.М. тадбиркорлик субъекти ва фермер хўжалигининг келгуси йилда экиладиган ғалла ер майдонлари гектарини кенгайтириб беришни ваъда қилгани аниқланган.
У хизматлари эвазига хўжалик раҳбари Х.дан 2 900 долларни фирибгарлик йўли билан олган вақтида ашёвий далиллар билан ушланган.
Ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилган. Ҳозирда тергов ҳаракатлари ўтказилмоқда.
